Sunday 12 June 2011

Chapter 1 : Aik Nazam


Aik Nazam:
Foreword

We believe in the power of thought – in focus, in sanity, in integrity of emotions … and most of all, in our own illusions.
It is that belief that must be tested… and judged.
But justice is served only when the time is right – which sadly is beyond our capabilities and unknown to our fears.
And so we fall…

Beware, for these words are woven together to project an image of truth; and not to convey another bleak message about duality of things. Neither do I seek to culminate a common ground for every fall we take as living, breathing human beings. What lies beneath is a story about the aftermath – with absolutely no intentions to draw a line or cast my own shadow on individual thoughts.
Knowing what we do, we tend to express what we do not know of. And maybe that is the beauty of our age – and the bane of our existence.
It is the beginning of another end. Dawning of a new day and setting of a new sun.

Let us pray that we may never fall again – that we may never encounter our vile selves and would always point in another direction … over and over again; till justice is served on a paper plate with a chest piece, curly fries and a side of mushroom salad.



Aik Nazam:
0. Tumheed

Aik nazam… aik ishara… aik awaz… aik soch… aik ahsaan…
aik guzarish… aik nasha… aik ghulaam… aik aghaaz… aik farz…
aik eemaan… aik sach… aik raasta… aik jangal…
aik behta darya… aik akhri jaam… aik pehla qadam…
aik kamzor sahara… aik khaali irada… aik main…
aik mujh jaisa… aik mujh say pehlay… aik mera nahi…
aik manhoos aasra… aik pagal nazara… aik choti si khwahish…
aik shikasta asmaan… aik qaatil zameen.. aik saath… aik baar…
aik hazaar umeedon ka aik kashkol liyay… aik jahil pujari…
aik murda zindagi ko aik haseen khayal ki tamanna main…
aik bay-dastoor dunya ki bulandion say aik baar phir girr kar…
aik haq… aik yaqeen liyay… aik dhokay main dooba… aik zaalim riyasat…
aik rahnuma… aik rahzun… aik shikaar… aik aurat… aik maseeha…
aik maqtal… aik zehr… aik ibaadat… aik Mehmood… aik Ayaaz…
aik lamhay main… aik khuda… aik shola… aik gharoor…
aik laakh naseehaton say zakhmi… aik chahat… aik nafrat main mubtila…
aik qarzdaar admi aik dafa phir tum say rehm ki bheek maang raha hay!!!!




Aik Nazam:
1. Girna

Ansoo girain…
Zakhmi hon kamsin khwaab
Chahat  talay…
Ho khokhli kainaat
Patt jhar…
Beetain yoon mosam kayee
Magar tum…
Beetay nahi aaj bhee…

Ashiyaan girain…
Har arzoo kay saath
Baadal girain…
Aasmaan kay baad
Mahel girain…
Aghosh main zameen kay
Kia yehi…
Hain akhri pal zindagi kay?

Paatay ho tum
Khud ko bulandi par
Aur najanay kioon
Chali jaati hay neechay nazar
Roshan aahon say chamakta jahan
Yeh sab hay tera
Tou khol ankhain, aur qadam barha…

Sawan barsay…
Aur bheegay har umeed
Khudaaon ko…
Girta bhee dekhay koi
Doobay tum…
Saath lekar yeh kainaat
Keh do…
Tum ab bhee bay bus nahi!

Paatay ho yoon
Khud ko bulandi par
Aur najanay kab
Chali jaati hay neechay nazar
Yeh kashmakash tujh say ghafil nahi
Phir kaisa girna?
Khol ankhain, aur qadam barha…
Bus khol ankhain, aur qadam barha…



Aik Nazam:
2. Chehron Kay Paar

Khamooshi…
Kiyoon aisi…?

Simta nafrat main qaraar
Marzi khuda ki… dushmani main rachi…

Khamooshi…
Ho aisi…

Thora sakoon chahiyay
Khoya junoon chahiyay
Thori shikast thora malaal
Puri umeedon kay saath
Thora sitam chahiyay
Tera rehm chahiyay
Aag aur badan chahiyay
Saanson ki garmi, ubalti, dehkti, dozakh main jannat… chahiyay!

Yeh jisam ki hay pukaar
Kisi chamaktay sitaray ki tarhan
Tareekh say chimti
Aik uryiaan haqeeqat
Maut say humbistar…
Aur jab tum ho jaogay seraab… tou chamko gey tum bhi
Kisi aghosh ki zeenat ban kar…

Simta dua-on main aitibaar
Munn ki khalish… khuda ban gayee…

Hum hamesha hain
Hum hamesha thay
Hum hamesha say
Hum he hain

Thora sukoon chahiyay
Ankhon main khoon chahiyay
Thori si chahat ki pyaas
Thora sa sach thora qayas
Thora jabar, thora lahoo
Thora sa ‘kia’, thora sa ‘kioon’
Kuch darmayan… kuch dar-badar
Yoonhi garajti, bikharti, behekti khamooshi… chahiyay!




Aik Nazam:
3. Marz Aur Marzi

Hay kitna asaan
Tujh main fanaa hona
Meri tareek wafaon ka
Tujh pay ayaan hona
Kuch tou hay shikayat
In kamzor haathon say
Yeh qudrat ki inayat
Is gumrahi ka sabab hay…

Main kehta hoon mazloom
Tum kehtay ho baaghi
Main kehta hoon ghalti
Tum kehtay ho maazi
Main kehta hoon bay rukhi
Tum kehtay ho hikmat
Main kehta hoon marz
Tum kehtay ho aadat

Jo ghum hain sadaqat kay
Wo shoq say seh loon
Khwahish kay taqazon pay
Tezaab undeloon
Nafrat jo ho taari
Tou ulfat ko nibhaon
Chehron ki khabasat ko
Ankhon say chupaaon…

Main kehta hoon mujrim
Tum kehtay ho majboor
Main kehta hoon bay hisi
Tum kehtay ho dastoor
Main kehta hoon zulm
Tum kehtay ho marzi
Main kehta hoon eesaar
Tum kehtay ho kumsini

“Bus itni si hay khata hay kay
Main apni adhoori saltanat ko
Tumhari bay yaqeeni kay hawalay
Kar dena chahta hoon…
Aur tum is murda jism ko
Buray waqton ka maskhara bana kar
Muskuratay ho… sitam dhatay ho
Jaantay ho… kay falak say jura
Yeh jafakaar… sadioon ki musafat
Tay kar kay tumhari dehleez pay
Dum tor chukka hay…

Tou kyun aik laash ko
Rakha hay zindagi kay darmayan?
Kyun paamaal kartay ho
Roz o shab is tarah?
Bus ab aur na satao…
Zara qareeb aao
Kuch insaaniyat dikhao
Aur us ko phaar khaao!”

Main kehta hoon jazbaat
Tum kehtay ho gunah
Main kehta hoon insaan
Tum kehtay ho khuda

Main aur kuch bhee nahee keh pata
Aur tum keh jatay ho buht kuch…!

  

Aik Nazam:
4. Jaanwar

Aik lamhay ko
Yeh socho kay abhi
Waqt ki harkat
Kis bay rukhi kay saath
Jawani ki laash ko…
Noch noch kar
Fanaa kar rahi hay…

Aur yeh khoonkhaar
Parhezgaar
Apnay daanton say
Reengtay haathon say
Teri rooh pay kesay zulm
Dhaa rahay hain…
Tujhay khaaye ja rahay hain…

Aur tum tou kehtay ho
Kay tum haal main bastay ho
Kay tumhari koshish hay kamiyaab
Aur main bhee… haara nahi

Magar yeh bhee tou sach hay kay
Nayee duniya ko bananay walay
Teri awaz dabanay walay
Tera aaj basanay walay
Us des ko janay walay
Tera khoon bahanay walay
Insaan hain… koi jaanwar tou nahi!!!?



Aik Nazam:
5. Ayeenay Say…

Tum wohi ho na?
Chanchal baharon ki mehki fiza jo tha
Mohsin khizaon ki tez hawa jo tha
Jo badalti ruton main
Ik shansa si shaam tha…

Tum wohi ho na?
Kaali raaton ka jo tha mezbaan
Roshan din-on ki lazzat jo tha
Jo ubharay tou sooraj
Aur chamkay tou sitara…

Bikhra yeh aks, tha saabit kabhi
Lakhon kirchion main qaidi hansi
Na dekho, na dekho… yeh woh nahi…

Tum wohi ho na?
Tha khwaabon ka musafir jo
Kabhi saakin, kabhi zaahir jo
Muskura kar, chupa kar
Jo rakhta tha har zakham…

Sanglaakh raahon pay ho kar nisaar
Apnay zindaan sey ho kar faraar
Jaam o jafa kay qisson main gum
Khud ko bhulanay ka lekar azam

Chala tha hasti lutanay ko rahi
Kisi dilfareb khumaar main dooba
apni ghulami kay daldal ki ronaq
kaali raaton main dhal kar siyaah
unhi hasraton ko khud main samo kar
behta gaya… dhansta gaya…

Aur phir jo wo ubhra
Tou kuch paas na tha
Na raat… na din… na koi khumaar
Hawa bhee ruki thi…
Weeraan roshni thi…
Jaan o jigar pay yaadon kay daagh
Jin ki chamak cheekh cheekh kay
Zehr zindagi ka ugal rahi thi…
Aur maazi ki guzar gaahon pay
Jazbaat kay luteron ki parchai-yan
Naye soorajon kay agay
Theen mehv-e-raqs…

Aisa tha yeh manzar
Kay us wajood ka har nuqs
Hua rooh pay haavi…

Thee yeh haqeeqat ki rah numai
Aur hans rahi thi khudai…

Ha ha ha ha ha
Aa ha ha ha ha ha
Ha ha ha ha ha



Aik Nazam:
6. Sajda

Aik din us makaan main
Basnay wala
Awazon ka aseer
Jhunjhula kar… girgira kar
Gira…

Ujalon say rooth kar
Chup chaap khayalon main
Naye deep jala kar
Apnay andheron ko ankhon main saja kar
Sar apnay kitnay hee ilzaam laga kar
Gira…

Gira, aur kho gaya…

Jo hua roshan nigahon ka andhera
Tou ahsaas ki tanhai nay
Khud ko akela na paya…
Sar utha kar… khauf chupa kar
Dekha kay…
Kafan posh kayee log kharay
Un kay honton pay taalay lagay
Chup chaap khayalon ki zubaan main
Apnay haathon ko uthaye huay
Ajab hisaar banaye huay
Ird gird kharay thay…

Phir goonji aik sadaa
Koi Soor phoonka gaya…
Aur gir gaye wo log…
Apni hee nazron main!

“Aay awaz kay aseer…
Kia poojtay ho khwaabon kay devta ko tum?
Kia jurm tumhara inhi logon ki tarha hay?
Kia tum bhee ho aag-o-tamanna say muztarib?
Taqdeer kay har mor ko kia kostay ho tum?”

Laraz gaye wo log…
Aur laraz uthi zameen…
Tauheed ki chitaa say
Chingaariaan ureen
  
Bola woh aseer:
“Na main tera mujrim hoon… na tu mera dushman
Na bughz say teray bhara hay mera daaman…
Main tou hoon bus ik saayaa…
Guzri zindagi ka
Aik murda admi ka…”

Ayee nidaa yeh phir, kay:
“Gustaakh teray lafz… hay baybaak teri soch
Kioon ghaafil hay naymaton say?
Kioon karta nahi shukar?
Jo jaanta hoon main… tu jaanta nahi…
Aadmi hay tu… koi khuda nahi...”

Bola aseer darr kay:
“Meray Maalik, meray gunah
Bay shumaar hain lekin…
Kia haq nahi insaan ka
Khwaabon ko taraashna?
Kia soch aur taskheer
Mera nahi shuaar?
Azmayen gay kab tak mujhay
Taqdeer kay sawaal?
Kab tak yeh umeedain meri
Muslehat ki aag ka
eendhan banain gee?
Justujoo meri hasti ki
Yunhi jalti rahay gee?”

Garja phir asmaan
Khashmageen saltanat…
Kafan poshon nay apnay haath
Zameen bos kar diyay…
Koondi phir bijliaan aur agaya jalaal
Kehnay lagay wo log yak-aawaz aik saath

“Hum saaz-e-Israfeel hain…
Humain jaltarang na jaan!
Hum hikmat kee riwayat hain…
Na kay jazbaat ka hejaan!”

Ayee Nidaa Falak say yeh:
“Aay muqaffal logo…
Jao tum ko amaan hay!
Yeh aseer hay yaadon ka
Is ki marzi kab yahan hay!
Is ki soch ka zindaan hay
Maqtal tumharay sach ka…
Uriyaan hay is kay qafas main
Tumharay noor ki devi!”

Phir gir gaye wo log…
Kafan phaar kay apnay
Aur utha aik shor naya…
Dharaktay dilon say!

“Hum hain tera husun…
Teri zindagi kay rung…
Na tu murda hay… na jaabir hay
Na apni soch pay qadir hay…
Chor runj ka daaman… bhula arzoo ki khoj
Naya jism kar talaash… nayee maut ki aghosh”

Bola Aseer apni nigahon ko jhuka kar
Un-dekhi hamaqaton ko gulzaar bana kar
“Hay qayam mera ahed
Aur shikasta mera eemaan
Meri zindagi kay rung…
Buht surkh ho chalay hain
Khwahish ka kaghaz…
Lahoo choos chuka hay!
Faraar… phir aik baar
Baykaar hee samjha…
Main apnay aap ko
Bus aik kirdaar he samjha!”

Haathon ko uthaye huay
Tehleel huay log…
Aur unkay honton kay wo taalay…
Toot chukay thay…

Hui larzaan phir zameen…
Aur chanay laga ghubaar
Ankhon kay andheron main
Hui gul phir chahat ki roshni…
Uthaya jo sar achanak
Tou badan bheeg chuka tha
Waqt ka dhaara…
Usi simt behnay laga tha…

Kesa kafan… kesa hisaar?
Yahan aur kuch na tha…
Nayee Awaazain
Shokh dilon ki… faaslon ki
farash say ubal pareen
Aur aseer un awazon ka…
Apnay labon ko see kar…
Ungliyaan ankhon main ghusa kar
Naye deep bujha kar…
Khwaabon kay andheron ko
aag laga kar
Dozakh bana kar…
Phir aik baar… Gir gaya!




Aik Nazam:
7. Ranjish

Khultay hain darwazay naye
Ahsaas ki galiyon main
Sajti hay nayee roshni
Gul hotay khayalon main…

Ruktay lafzon ko labon say
Khushboo chura lay
Oonchi oonchi si nazar ko
Neecha dikha dey…

Wo jo tujh main dikha hay
Kuch nahi, bus ik khila hay
Wo jo mujh say jura hay
Wo insaan doosra hay
Oonchi nigahen…
Bolti jayen… shor machayen!


Uthtay hain toofan naye
In ghasib dilon say
Pagal barkha chum chum barsay
Khushk Badalon say…

Khaak hay jism ki ranjish
Khoon hay haathon pay
Behtay hain masoom angaray
Nazuk si zubaan say…

Wo jo tujh main chupa hay
Kuch nahi, bus ik gunah hay
Wo jo mujh saa dikha hay
Wo ajnabi doosra hay
Khaali nigahen…
Cheekhti jayen… shor machayen!


Aik Nazam:
8. Saboot

Bharna chaho jo tum yeh shigaaf
Khurcho in Zakhmon ko aik baar
Choro qismat kay likhay ko tum
Meray seenay ko jala do aaj
Kar do raakh…

Menay kuch kaha tou nahi
Aisa kuch hua tou nahi
Phir bhee…
Bay-waja… kuch na tha

Kioon na pehlay mehka yeh suroor?
Jaantay ho tum apna qasoor
Poocho mujh say kia hay yeh majira
Hasraton main sulagti iltija

Menay kuch kaha tou nahi
Aisa kuch hua tou nahi
Phir bhee…
Koi tha… kuch na tha


Aik Nazam:
9. Haasil

Shukriya…
Shukriya tumhara
Main bhala… kesay ada karoon

Sun lia…
Shikwa tumhara
Ab kaho… kesi saza doon?

Kumla gaye,
Yaadon kay rung…
Teri hansi,
Mera kafan…
Dil kay soorakh
Banay raasta…
Gumrahiyon ki,
Amaajgaah…

Bund khirkiyaan,
Bekaar khoj…
Khushboo teri,
Aur meri soch…
Saansain teri,
Meri fiza…
Utarta nasha…
Hosh ka…

Tu hay mujh say munsalik
Main tujh main hoon dafan
Tu mujh main tou nahi
Main tujh main hoon dafan…

Chapter 2 : Qissa Aik Raat Ka


12:02 am
0. Zawaal

Hui tareek nigahon say
Ojhal haqeeqat
Aur phel gaye shab kay saaye
Bujhti rahi andheron ki pyaas
Timtimanay lagay…
sitaron kay charagh
Khamoosh roshni, chan chan karti
Bikharti rahi khayalon pay…
Taareekh kay kirdaron pay…
Aur yaadon kay ada-kaar
Naye dhong racha kar
Bojhal palkon main…
Neend saja kar
Baandhnay lagay phir rakht-e-safar…

Koi rahguzar nahi...!
Koi chara gar nahi…!


12:20 am
1. Takmeel

Nazar kidhar
Chup chaap dekhti hay?
Khilaaon main pinhaan
Wo israar dekhti hay

Chaar deewari na kaho
Duniya hay yeh meri
Akeli si, anhoni si
Kesay angaaron main ghiri

Haan yeh sholay tanhaiyon kay
Is qafas ki laaj hain…
Gaye waqton ki yaad hain..

Tou bharkao in yaadon ko
Jo is raat ki tarah…
khamoosh…
Lapakti hain…
maazi kay aatish kadon say…
Jo in gulnaar khayalon ko
Naye makhmaleen khol charha kay
Siyaah lafzon kay libaday urha kay
Tareek rakhain gee

Kay anay walay
kisi rahro ko
Yeh khayal na aye…
Kay yahan…
Gosha nasheen koi
Fikar farosh kabhi tha…

Yaadon kay chilman say
Koi ankh na uthay
Is raat kay qafas say
Koi bhaag na sakay…

In adhoori kahaniyon ko
Takmeel tak puhnchayen…
Ik naya raasta dikhayen…
Aao kuch aur pareshaan ho jayen!



1:00 am
2. Shehzadi

Mar miti hay jin naqoosh pay
Wo raazdaan teray nahi
Jo khauf ka mayaar hain
Ik rait ki deewaar hain…

Azal say hay yeh rooh qaid
Aur khwaabnaak hain yeh pal
Nami jo ankh main rehti hay
Meri simt jo behti hay

Luta denay ko yoon tou
hain kayee raaz bay qarar
Kitnay chaand hain sapno kay
Kitnay ghum k sitaray hain

Yoon thum na jati meri saans
Jo tu itni inayat say…
Mujhay rubaru bithati
Aur yeh raat bikhar jati…

Kay pyaasay dil bhee hain
Aur yeh pal bhee…
Yeh chaand bhee, chilman bhee
Yeh jaan-ba-lub qaatil bhee
Hain saagar-o-sahil bhee
Wo bhee hay aur tum bhee…

Yeh junoon pyaas ko uksaye ga
Nayee roshni phailaye ga
Teri aankhon main sama jaye ga
Tujhay rangon main lay ayega
Aur khud fana ho jayega…!



1:31 am
3. Ahmaq

Dekho… zara yeh chehra bhee dekh lo
Kay kis ihtimaam say
Yeh hejaan sajaya hay!
Kia andaaz apnaya hay!
Kuch aur kaho… kia chupana chaho gay?
Kab tak na samajh pao gay?

Haan yeh thokar… is ka jashan manaoon?
Rangon main jhilmilaaon?
Khushi kay geet gungunaaon?

Dekho… zara yeh hansna bhee dekh lo
Jab aye ho yoon sanwar kay
In ankhon main khwaab bhar kay
Kay jinki takmeel… mera azm tha…
Yeh hansna… kisi maut say kia kum tha?
Kuch aur jo kami ho tou yeh rooh karoon nisaar?

Suno… zara in labon ki bhee sun lo
Jo teri tamanna main
In zakhmon ka zehr… choostay hain…
Aur khoon thooktay hain…

Yeh jo rah teri takta hay
Yeh jo tujh say wabista hay
Yeh jo teray sukh main hasta hay
Usi chehray main khuda basta hay

  

2:07 am
4. Mujrim/Anjaam

Adawat khuda say yoon tou
Niri insaniyat ko hay
Main nay jo baghawat ki…
Tou kia gunah kiya?

Qudrat ki muslehat say
Aik alam ko hay shikwa
Main nay jo shikayat ki…
Tou kia bura kiya?

Kia jano meray kurb ki
gehraiyon ko tum?
Kis ahsaas kay wazan talay
Yeh wajood dafan hay…

Karo roshni yahan
Parho dil say faatiha…

Kabhi pa kar jo na khoyee
Usi tabeer kay dum say
Main nay basti nayee basai…
Tou kia ghazab kiya?

Yeh duniya tou azal say
Hay kirno ki pujari
Ki main nay bhi in say paarsai…
Tou ki ghalat kia?

Kis moun say mujhay
detay ho jeenay ka hosla?
Kia jano meri zaat ki
Kotahiyon ko tum…

Yeh lehd tum sajao gay
Sureelay geet gao gay
Meray qissay suano gay
Phir bhool jao gay…

Aur main…
Yaheen bhatakta rahunga…



3:16 am
5. Baaghbaan

Wo kehtay hain kay main hoon
Aur wo hai yaheen
Rehtay hain tarsay dilon main
Haan wo hain yaheen

Koi aur…
Kyun na hota?

Jo muskura kar, kisi bhanwar ki tarha
Apni hee gehraiyon main doob jata
Aur kitna maza ata…

Sambhaltay hain jo hawaas
Wo meray nahi
Chalaktay yeh jazbaat
Hain meray nahi

Koi aur?
Kyun na hota?

Jo sar jhuka kay, kisi shikasta shajar ki tarha
Kisi cheekhtay sooraj ki bulandi ko choo leta
Aur zindagi jee leta…

Koi aur?
Koi aur… kyun na hota?
Jab main kabhi na tha…


  
3:53 am
6. Gehrai

Aik taraf hain chamakti lehrain
Kirno main dhali…
Aik taraf hain khata kay ansoo
Aur doobta admi…
Uthta hay wahem ka toofaan
Chalay malaal ki andhi…
Kon janay is lamhay ka
Kon hay qaidi?

Sada say hay arzoo…
Tujhay saahil bana loon
Magar main tou sagar nahi…

Khushk dil main bharta paani
Honton say chalkay
Ankhon ki gehraiyon main
Koi aag si lagay
Kia ajab hay kay tu inhi mojoun
Kay sung chalay
Aur meri aabroo in lehron main
Lut-ti rahay…

Hay sada say yehi arzoo…
Tujhay saahil bana loon
Magar main tou sagar nahi…

Inhi mojoun main utar jaaon…
Main bhi ik bhanwar ban jaaon!


  
4:17 am
7. Qaatil

Yeh hay meri kaal nagri
Aur main hoon iska farishta…
Main khuld hoon sitam ki
Wehshat ka andhera hoon

Yeh kasak meri siyahi hay
Jo meri jabeen pay…
Hay aweezaan,
Usi tarah…
Jaisay tu nay sajayaee thi
Aur jabeen muskurai thi…

Main raqabat hoon
Main sadaqat hoon
Kayee naam hain meray
Khata-kaar, saza-war…
Budgumaan bhee hoon

Main raahi hoon weerano ka
Mehektay, khwaabeeda shabistano ka
Pur fareb insaano ka…
Jo meri ibadat ki hain mairaaj
Meray jazbon ka imtizaaj…
Sajda jinhain main nay
Kayee sadion tak kiya hay
Khoorooj-e-zeest diya hay

Shor hasti main meri
Dard o shikayat ka para hay
Haan yeh waar, is gunahgar kay
Haathon say hua hay…

Aur ab beh raha hay khoon…
Najanay kioon?



4:55 am
8. Ronaq

Shaam rungeen
Pur-kaif ujalon main doobi
Nasheelay iradon main rachi…
Khushboo nazakaton ki
Rung layee hay…
Haan dekho… bahaar aye hay…

Ayeena muskura kar
Chamaktay aks say sharma gaya
Aur muattar huin dil ki galiyaan
Milan ki sej pay kaliyaan…
Waadon ki khil rahi hain
Chund saa’atain mil rahi hain…

Ulfat ki ronamai hay
Qismat ki aqda-kushai hay…
Haan dekho… bahar aye hay…

Saanson ki hakoomat
Main naya walwala macha hay
Qurbat ka ghul bapa hay…
Raqsaan hay labon pay
Muskaan dheemi dheemi…
Nayee chahaton ki aseer
Naye chehron ki taskheer…

Pur-lutf, khwaabon si hay yeh shaam
Dhalti hay jo… dheeray dheeray
Simat-ti hay libaaday main raat kay
Teray husn ki poshaak ban kar
Dilnasheen, mahjabeen umangon ki
Mutarannum awaaz ban kar…

Sehmi sehmi…
Bheegi bheegi…
Madhosh sargoshiyaan hain
Chupi chupi si…
Hay palkon main sukh ki baaz gasht
Ik nashay ki kayfiat…
Jo tujhay suhani neend ki
Waadiyon main utaar kar
Teri jannat sanwaar kar
Kasak ka naag banay gee
Mujhay raat bhar dasay gee…



5:12 am
9. Mantaq

Chaho tou rung do
Is kal main aaj apna…
Heraan…
Mujrim hoon nafrat ka
Mujh ko hay teri amaan…
Shaitaan…

Chupptay ho kioon?
Pardon main…
Unkahi rahatain, kitni qareeb
Aur tum bhee tou ho phir admi…

Kia duniya, kia hikmat?
Kia qudrat, kia muslehat…?
Jhoot…
Raasikh iraday hain
Khwahish kay piyaasay hain
Mazboot…

Yeh kamzoriaan, teri panah
Aur koi khuda nahi yahan…
Mantaq… mazhab… baatain…

Haath barhain… gardan tak puhnchain
Aur phir na rukain…

“Haan… kitna asaan hay sab tumharay liyay…
Aur faqat aik hee maqsad…
Bay dard… sard… laa-deen…
Tum say kis dua ka waseela maangoon?
Kis wafadari ka sila maangoon?
Jo na mil saka, maangoon?”
Mujhay bata meray Khuda… kia maangoon???!!?”

“Maqsad? Mantaq? Rehmat?
Qurbat? Qismat? Shiddat?
Main nahi chahta!
Main nahi chahta!
Main nahi jeeta.. hoon yahan!!”

“Aas rakho…
Kay yeh waqt bhee guzar jayega…
Naya daur ayega…
Himmat pakro…
Kay hum sab ki zindagi…
Inhi zakhmon say saji hay…”

“Dekhna aik din tum bhee
Ho gay jalwagar,
Is ubhartay sooraj ki tarah…”

“Yeh Baatain saari
Meray yaqeen say baeed hain
Jesay yeh dard mera
Tumharay ahsaas say…”

Aur tum bhee tou ho phir admi…
Aur ab yahan kuch bacha bhee nahi…
Haan ab yahan kuch bacha nahi!
Haan ab yahan koi khuda nahi…!


5:37 am
10. Zaaviyay

Tum ney dekha
Kay buland haathon main
Hay girafta
Tumhara khwaab
Aur barh chalay tum
Bay awaaz aur baydharak… us taraf

Yeh kaisi razakari hay?
Qurbat ka wajd taari hay…
Kia alam-e-bedaari hay!

Us nay dekha
Kayee chehron main runga
Uska sakoon
Uski talaash
Aur jee utha wo yoon
Zindagee ki, bekhudi ki… chah main

Yeh qismaton kay raaz hain
Kin chahaton kay saaz hain?
Yeh rung-e-kainaat hain!

Main nay dekhi
Woh roshni jo kho betha tha
Jiskay dhokay main
Kayee zukhm sajaye thay
Aur kho chala main yoon
Arzoo kay, rung-o-boo kay… saraab main

Main jafa-on ka sawali tha
Woh jazbaat say khaali tha

Kis nay dekha?
Siyaah asmaan pay jhoolta
Woh chaand?
Jiski roshni
Is bay-dili ko
Ik saaya naya day gee…
Aur neend cheen lay gee…